Êla malincunî cla nabbia sutilénna
ch’l’avólz al côr pianén,
come bunbès mulsénna
e tavvda come un pipién ?

L’arîva d’impruvîs un po’ ardupè,
se’t sént ‘n inserenèta a mezanòt,
insàmm a un zîg ‘d viulén zå par la strè,
cal canta a la sô dôna un bèl zuvnòt.

Êla malincunî cal quèl t’an saréss dîr,
che in fånd al ståmmg t’at sént
e ad nôt ant fa durmîr,
se at ciâpa in zért mumént ?

Al sån dal mèr luntàn,
ch’at pôrta un sóppi ed vänt,
al vérs ‘d socuànt gabiàn
e indrî a taurna la mänt.

Êla malincunî cal gråpp t’at sént in gåula
se at pèns ai ân passè
et vad che al tänp al våula
e la zoventó l’è andè ?

Un râz ed såul brilànt
ch’s’infîla in mèz ai scûr,
a iluminèr, birbànt,
al fôto ch’i er’n al bûr.

E cla vójja ed zighèr
che at vén sänza mutîv
st’at tróv un dé a pensèr
ch’l’è acsé bèl èser vîv,

mo at vréss fèr quèl ed divérs
e at vén da scapèr vî,
in cô anc a l’univérs,
êla malincunî ?

Sé, l’è malincunî
e l’è un vèg sentimänt,
però vultèr’s indrî,
l’angósstia solamänt,

l’è méi guardèr luntàn,
tirèr drétt ustinè,
tgnàndes insàmm, par man,
con gran serenitè !

trad. italiana

E’ malinconia?

E’ malinconia quella nebbia sottile
che avvolge il cuore pianino
come bambagia morbida
e tiepida come un pulcino?

Arriva all’improvviso un po’ nascosta ,
se senti una serenata a mezzanotte,
insieme al pianto di un violino nella strada,
che canta alla sua donna un bel giovanotto.

E’ malinconia quella cosa che non sapresti dire,
che in fondo allo stomaco ti senti
e di notte non ti fa dormire
se ti prende in certi momenti?

Il suono del mare lontano,
che ti porta un soffio di vento,
il verso di alcuni gabbiani
e indietro torna la mente.

E’ malinconia quel nodo che ti senti in gola
se pensi agli anni passati
e vedi che il tempo vola
e la gioventù è andata?

Un raggio di sole brillante
che s’infila in mezzo agli scuri,
a illuminare, birbante ,
le foto che erano al buio.

E quella voglia di piangere
che ti viene senza motivo
se ti trovi un giorno a pensare
che è così bello essere vivi,

ma vorresti fare qualcosa di diverso
e ti viene da scappare via,
in capo anche all’universo,
è malinconia?

Sì, è malinconia
ed è uno strano sentimento,
però voltarsi indietro,
inquieta solamente,

è meglio guardare lontano,
tirare dritto ostinati,
tenendosi insieme per mano,
con gran serenità!