2^a poesia classificata
di Elio Evangelisti - Bologna

Al camén

Fôra l’é fradd, al pèr che al vóiia anvèr;
la nôna l’ é in cusénna a preparèr
da zànna; l’ é drî a fèr la pulènt
e mé a stag a guardèr e a sòn cuntènt
parché a ôt – dis ân am sintèva récc
a stèr al chèld in dal cantòn di stécc.
Un còpp contr’al parôl par méttri al znôc’
quand l’armisdèva, la nôna, e col sô ôc’
li la badèva che sèmper al buiéss
al granisèl, mo ch ‘an s’abaluchéss,
e vi e vi pian pian la i azuntèva
la farénna piò fénna e l’armisdèva
sènza farmères mai gnanc un minûd
e sènza avèir bisòggn d’ inción aiût;
mé avèva sòul da métter un quèlc zôc
in môd che al fug al fóss né tròp né pôc.
L’era lèreg e grand ste bèl camén
col muiàtt, la palàtta e al svintlén
fat con al pànn dl’èlia d’una galénna
par fèr vènt sòtta al brès a la maténna.
Comm l’era nèigher al cûl ed cal parol,
nèigra la câpa, i cavdón, al caminarôl
e nèigra la cadénna col sòu anèli;
totti sti côs, a mé, am parèven bèli.
Al tripî con in vatta al stagnadén
e al bûs di sùlfen (adès coi sulfanén);
la zander in d’ na móccia bèn ardótta
in mod che al brès agli avanzéssen sotta
par turnères a impièr a la maténna
con un pô ‘d chèrta, du stécc, na supiadénna
con tótta l’aria ch’avèva dèntr’al pèt;
sòtta la zànder anc chèlda, dal patèt
e lé ind la rôla, col grèn ed furmintòn
a s fèva i galétt: comm l’era incôsa bòn!
Che sicurazza ch’al dèva ste camén
e al cuntintèva tótt, i grand e i cén.
Oddio, quand l’aria l èra bâsa, al suzdèva
che in dla cusénna e in cà a s’ardusèva
na gran fumèna, ma dòpp, in un mumènt
a avrir dòu port par fèr un po ‘d curènt
la fiama l’arivèva pian pianén
e a i arturnèva al fug in dal camén.
I arcôrd, quand a guardèn dimondi indrî
a i é al réschi ch’ i dvènten fantasî,
che la memoria la i vadda trasfurmè
e forsi un po luntàn da la realtè.
Incû l’é comèd al riscaldamant
l’impiant zentralizè o indipendant
al schèlda totta la cà coi radiatur;
mé av dégg un quèl, ed quast a sòn sicûr:
a sti impiânt a i amanca un gran valòur,
senz’èter i schèlden, mo i dan brîsa calòur.

Il camino

Fuori è freddo, sembra che voglia nevicare;
la nonna è in cucina a preparare
la cena: sta facendo la polenta
e io la guardo e sono contento
perché a otto - dieci anni mi sentivo ricco
a stare al caldo nel cantone degli stecchi.
Un coppo contro il paiolo per appoggiarci il ginocchio
quando mescolava, la nonna, e col suo occhio
badava sempre che bollisse
la farina grossa, che non facesse i grumi,
e piano piano aggiungeva
la farina più fine, e mescolava
senza mai fermarsi per due minuti
e senza aver bisogno d’alcun aiuto;
io dovevo solo aggiungere qualche ciocco
in modo che il fuoco fosse né troppo né poco.
Era largo e grande questo bel camino
con le molle, la paletta ed il ventaglio
fatto con le penne d’ala di una gallina
per far vento sotto la brace alla mattina.
Com’era nero il fondo di quel paiolo,
nera la cappa, gli alari, la canna
e nera la catena con i suoi anelli:
tutte queste cose, a me, sembravano belle.
Il treppiede con sopra il pentolino
e il buco degli zolfanelli (adesso ci sono i fiammiferi);
la cenere in un mucchio ben ridotto
in modo che la brace rimanesse sotto
per tornare ad accendersi al mattino
con un poco di carta, due stecchi, una soffiatina
con tutta l’aria che avevo nel petto;
sotto la cenere ancora calda alcune patate
e lì sulla “ ruola” con i chicchi di granoturco
facevamo i galletti: come era tutto buono!
Che sicurezza dava questo camino,
accontentava tutti, grandi e piccini.
Oddio, quando l’aria era bassa succedeva
che in cucina ed in casa si ammucchiava
un gran fumo, ma dopo, in un momento
aprendo due porte per fare un poco di corrente
la fiamma arrivava piano piano
e ritornava il fuoco nel camino.
I ricordi, quando guardiamo molto indietro,
c’è il rischio che diventino fantasia,
che la memoria li veda trasformati
e forse un poco lontani dalla realtà.
Oggi è comodo il riscaldamento
l’impianto centralizzato o indipendente
riscalda tutta la casa coi radiatori;
io vi dico una cosa e di questo sono sicuro:
a questi impianti manca un gran valore,
senz’altro scaldano, ma non danno calore.

Ritorna alla graduatoria